Форум младих Рускей матки настал 2001. року як младежска секция Рускей матки. Теди Форум перши раз ишол на Шветови конґрес Руснацох/Русинох/Лемкох. 2003. року ше на истим тим конґресу Форумаше вияшнєли же сцу буц самостойни и претаргнуц кажди контакт зоз Руску матку. Так настал Пацт Рутхенорум. Єден час медзи младима Руснацами хтори ше зберали у Матки бул зацих. Алє, 2005. року Форум обновени, реактивирани и нова делеґация младих пошла на Шветови конґрес и форум РРЛ, до Кринїци у Польскей. Були то Микола Медєши, Настася Шайтош, Тат’яна Силадї, Желько Ловренчич и Владимир Бодянец. Указало ше же тота екипа мала тото цо було нєобходне же би порушала збуваня медзи младима и тельо ше визначела же Микола Медєши вибрани за предсидателя Шветового форума младих РРЛ. Тот ентузиязем потирвал та нарок у нас орґанизовани Камп на хтори пришли нашо нови  приятелє зоз Польскей, Словацкей и Горватскей. Три днї зме ше преводзели у Руским Керестуре, Коцуре и Новим Садзе. Шицко прешло у найлєпшим шоре, а госци були барз задовольни.

Того 2006. року орґанизовани перши маскембал и то у малей сали РКПД у Новим Садзе. Гоч условия були досц скромни, публика ше одлично преведла та маскембал постал традиционални и отримує ше каждого року, у велькей сали и зоз вше векшим числом нащивительох, а Форум постал препознатлїви по белавим коктелу.  

До 2007. року зме вошли сциха алє зме ше рихтали за нови Шветови форум, и то у Сиґету у Румуниї.  Екипа ше уж дакус пременєла. Знова пошли Микокла Медєши и Тат’яна Силадї, а придружели им ше Анита Ґовля и Владислав Цап. Бул то ище єден добри наступ. Указало ше же и далєй Форум младих Рускей матки наймоцнєйша младежска орґанизация. Делеґати у релативно кратким чаше успишно прешли шицки плановани теми и вибрали нове руководство. Представнїки шицких делеґацийох поднєсли звити о своїх активносцох у претходних двох рокох и дали предклади о дальшей роботи Шветового Форума младих. Єдина заувага же зме нє мали нїяке озвученє та було барз чежко чуц бешеднїкох. Банкомат хотела нєпреривно лопотал покля ше єдєн хлапец зоз польскей делегациї нє досетел написац и залїпиц знак ”СТОП” на тот банкомат. И наисце, людзе почитовали тот знак, а ми були мирни. Зоз Сиґету зме пошли полни упечаткох и зоз прекрасним чувством єдинства хторе ше може почувствовац лєм кед ше на єдним месце найду телї Руснаци зоз цалого швета.

Єшень 2007. року означели нови виберанки. Пре даяки причини тедишнї предсидатель ФМРМ, Микола Медєши, нє бул у могучносци витворйовац свойо обовязки та орґанизована позарядова виберанкова скупштина ФМРМ. Як цо то обичай у нашим штредку, анї єдни виберанки нє можу прейсц без проблемох и нєприємносцох. На першей скупштини (1.11.2007.) вибране лєм привремене руководство а два тижнї познєйше (15.11.2007.) вибране  дефинитивне руководство. За предсидателя вибрани Владислав Цап, а подпредсидателє Тат’яана Силадї и Будимир Сабо-Дайко. То виволало даяки особни конфликти, алє вони нас нє застановели у намаганьох же би ФМРМ звекшал число своїх активносцох.

Так, шлїдуюца активносц була орґанизация едукативней журки 1.12.2007. з нагоди Шветового дня борби процив сиди. Журку зме витворели у сотруднїцтву зоз ЈАЗАС-ом хтори нам обезпечел пропаґандни материял, а финансийно нам помогла Руска Матка и єден спонзор.

            И 2008. рок почал мирно. У другей половки рока зме почали зоз турнею по местох дзе жию Руснаци, бешедовали зме зоз нїма и велї зоз нїх постали нашо члени.  У октобру ушлїдзел маскембал, а 17. децембра историйни вечар хтори зме орґанизовали же би зме збохацели нашо активносци и робели на едукациї младих. Госц хтори отримал преподаванє о историї Руснацох бул проф. др Церовић. Клуб РКПД-а бул полни, а нащивителє виражели жаданє же би було вецей таки преподаваня. Потрудзиме ше випольнЇц жаданє публики.

            2009. рок зме почали зоз моцним жаданєм же би зме ше кноєчно реґистровали як самостойна орґанизация пре даяки формални питаня, легчейше финансованє и даяки правила хтори ше дотикаю Шветового конгресу РРЛ. Пре тото и дзепоєдни интерни нєскладаня 11. фебруара зволана нова сновательна скупштина ФМРМ. У барз напартей атмосфери усвоєни Статут ФМРМ и вибране нове руководство. По тим настали нови проблеми и нєпорозуменя алє конєчно були позберани и придати шицки папери за реґистрацию. У фебруару зме мали и барз удатну журку з нагоди Дня залюбених хтору зме орґанизовали у сотруднїцтву зоз РКПД-ом. Нащивительом були понукнути велї интересантни змисти и бависка хтори були барз добре прияти.

И на концу, штвартого  априла 2009. року Форум младих Рускей матки реґистровани як самостойна орґанизация хтора предлужує зоз блїзкима одношенями и сотруднїцтвом зоз Руску матку.